Coles señes del agua

Esta publicación acueye la obra poética de Lourdes Álvarez, considerada anguaño como una de les voces de mayor relieve de la poesía asturiana contemporánea. Señala Raquel Fernández Menéndez, na introducción que precede a la obra equí reunida, los que son «dalgunos de los intereses y temátiques manifestaos nel llargor de la so trayectoria poética: el silenciu como fonte de sentíu, les tensiones ente’l suxetu llíricu y el suxetu autobiográficu, y, de manera bien fonda, la defensa de la ficción poética como ferramienta pa comprender y comprendese. Polo tanto, dende la publicación d’Aldabes del olvidu hasta’l más reciente P’anular los adioses, la obra de Lourdes Álvarez preséntase como un proyectu cohesionáu y coherente, con temes y motivos que trescienden la dimensión intimista a la que se suel arreyar la so producción pa sorrayar l’importante papel de la poesía na vida pública».